धरती पै हर व्यक्ति बराबर है भैया

धरती पै हर व्यक्ति बराबर है भैया ।
कंकर-कंकर में शिवशंकर है भैया ॥
 
कछ लोग’न कों जीवन है नन्दन-कानन ।
कछ लोग’न कों जीवन नश्वर है भैया ॥
 
तन बेचारौ करि-करि कें हू का करिहै ।
रुत भौजाई मनुआ देवर है भैया ॥
 
कद-काठी वारौ तौ ऊपर वारौ है ।
अपनी मरजी राई बराबर है भैया ॥
 
जब देखौ तब क्लास लगावै वोटर की ।
हर नेता विद्वान धुरंधर है भैया ॥
 
लिप्सा के जैसौ ही लालच होवै है ।
बन्दरिया है बहना, बन्दर है भैया ॥
 
प्रकट तत्व हू नाँहि दिखे तौ भेद खुलौ ।
असली उजियारौ तौ भीतर है भैया ॥